Satua Bali "I Belog Nganten Ajak Bangke"

Satua Bali

I Belog Nganten Ajak Bangke

Ada tuturan satua I Belog, geginanne melali teken medaar dogen. Sedek dina anu, I Belog melali-lali ke desa len. Di mulihne iye ngentasin sema linggah pisan. Mare iye neked di tengah semane, iye nepukin bangken anak luh kaliwat jegeg pisan. I Belog lantas ngomong : "Luh-luh, nyak mekurenan ngajak icang?". Anake ento mendep dogen. "Beh iye nyak teken iraga, melahang gandong dogen ia ajak mulih". Sambilanga ngarengkeng keto, lantas bangkene ento abana ka umahne, tur celepanga kumah meten. I Belog lantas morahan teken memenne : "Meme, meme, icang ngarorod, ajak anak luh jegeg pesan". Memenne ngomong: "Anak luh dije ento?" I Belog masaut : "Di semana bakat saup mara". Memenne buin ngomong : " Men dija ia jani ?" I Belog buin ngomong : "Ento apa jumah meten, me da delokina malu, krana ia nu lek".

Suud ia ngomong keto, lantas ia nyinduk nasi lakar baanga kurenanne. Mara ia neked jumahan meten, nasine ento pejanga di samping anake luh ento sambilanga ngomong : "Luh-luh, bangun malu madaar nasi". Makelo I Belog ngantosang ditu, masih anake ento tusing nyak bangun. I Belog lantas makeneh-keneh : "Eh, jenenga ia lek mara tongosin, melahang jani kalahin". Sambilanga ngomong keto, lantas ia pesu, tur jelanane ubetanga. Krana benne jaen-jaen, lantas teka menge kumahan meten, ngamah benne ento. Pagereng pada menge jumahan meten, ngamah benne ento, ada ane ngamah jukutne muah ada ane ngekeh nasinne. Sesubanne benne telah, lantas menge pada megedi.

Nyananne I Belog teka nelokin kurenanne, dapetanga nasinne maura, tur benne sube telah. I Belog ngenggalang pesu, morahan teken memenne. Kene omongne : "Meme, meme, kurenan icange sube madaar, buina ia tusing demen teken nasi, be dogen demenina". I Belog lantas nyemak be apinggan, baanga kurenanne.

Nyananne mara delokina, dapetanga bene sube telah. I Belog kendel pesan kenehne, kadena kurenanne ane nelahang. Sai-sai I Belog ngejang be, disamping anake luh ento, nanging disubanne I Belog magedi, teka menge ngamah benne ento.

Keto sai-sai kanti bangken anake luh ento berek, tur bonne bengu pesan. Makelo-kelo lantas memen I Belog makeneh-keneh :"Nguda mantune tusing pesu-pesu, laka delokin ja". Memenne lantas macelep mulihan, saget dapetanga ada bangke sube berek. Lantas ia pesu ngalih I Belog. "Ih Belog nguda cai ngejang anak mati jumahan meten?" I Belog masaut :" Nguda orahang meme mati kurenan icange ?". I Belog lantas ajaka kumahan meten teken memenne. Ih Belog, ento apa sube berek, buina bengu pesan bonne". I Belog lantas ngomong : "Meme, yen anake mati, bengu bonne?" Memenne lantasasaut : "Aa, yen anak mati bengu bonne, buina nyem awakne". I Belog buin ngomong :"Kenkenang ia jani?" Memenne mesaut :" Pulang ke semer". Sambilanga memenne ngomong keto, lantas bangkene ento jemaka tur pulanga ka semere.

I Belog nengil dogen, tusing nyak nulungin memenne. Sasubanne memenne suud ngentungang bangkene ento, lantas ia mulih. Memenne tunden manjus, ento awananne bonne bengu. I Belog lantas ngomong :" Meme, meme, nguda bengu bone, jenenga meme mati". Memenne masaut : "Tusing, meme anak nu idup" I Belog buin ngomong : "Apa tusing, meme suba mati, bonne bengu pesan, jani meme lakar kutang". Sambilanga ngomong keto, lantas memenne kejuk, tur kapaid, ka aba ka semer. Memenne kerik-kerik, masih tusing ringuanga, lantas kacelempungan ka semer.

Kacarita I Belog nu padidina, tusing ada anak nyakanang, ban layah basangne, lantas ia ka peken meli ubi, kasela, gatep muah ane len-lenan, ane sarwa mudah-mudah. Sasubanne betek basangne, lantas ia mulih. Jani I Belog nongos jumahne padidina, tusing ada anak ajaka ngomong. Nujuang pesan ia ngentut, tur bonne bengu. I Belog lantas mekeneh :"Beh i dewek mati jani, tonden med idup suba mati ". Sambilanga ngomong keto, lantas ia malaib ka semer, lantas pulanga ibanne. Payu I Belog mati.

-Puput-